Palas zirkularra Arrious bailaratik

Palas gailurra Arrious bailaratik, Geodesikoen aristatik igota eta Ledormeur tximiniatik jeitsita. Caillou de Soquesetik aterata, Arriouseko lepora igo. Handik Arriouseko lakura eta passage d'Orteig deiturikotik Arremoulit aterpera. Pausu hau kable batekin babesturik dago, oso erraza da baina erorketa handia du.
Arremoulit aterpetik Palaseko lepora igotzen hasi eta 10 minutura bide hori utzi eta ezkerreruntz hartuko dugu Geodesikoen bretxaruntz. Mendi guztia inguratzen du bideak, eta tarteka pixkat deserosoa egiten da harri artean ibiltzea. Geodesikoen bretxara iristean hasten da arista. Nahiko erraza da, gehienez II mailako pausuak ditu, baina tarteka nahiko aereoa da. Gendarme beltza deiturikoa eskubitik inguratu behar da, eta tarte horretan amildegi handia dago gure azpian, baina ez da batere zaila. Garrantzitsua da hitoak ondo jarraitzea bide errazena topatzeko. Gendarmea inguratu eta gero ertzetik joango gara gailurreraino.
Jeitsiera Arrieleko lakuetaruntz egingo dugu Ledormeur tximiniatik. Hasieran kanal luze bat jeitsiko dugu harri solte artean, eta gero ezkerreruntz Ledormeur tximiniaruntz joango gara. Tximiniako sarrera margoz adierazita dago. Ez hartu eskubiko tximinia, X handi batekin adierazita dago bide okerra dela. Tximinia bera ez da zaila, II mailako pausuak ditu, erraz destrepatzen da, baina komeni da kaskoa eramatea, batez ere jende gehiago badabil. Tximinia eta gero Arriel lakurantz jeisten hasiko gara baina berehala eskubirantz hartu horizontalean Palas lepora joateko. Hemendik Arremoulit aterpera jeitsi zuzen zuzen eta gero kotxera, igotako bide beretik.