Aginamendi

Herriko plazatik abiatzen den ibilbidea Santuenea, Txokoalde eta Agina bitartean dauden erriberetan barrena hasten da. Ondoren Mapil-eko errekatik gora Mendizorrotz aldera igotzen da, bertatik berriz Arratzain aldera jaitsi eta Arana-errekatik barrena herrira bueltatzen da. Usurbilgo landa guneak eta Donostialdeko bistez gozatzeko aukera ematen duen mendi ibilbidea da.

Honako ibilbidea, Mikel Laboa plazatik pasatzen da:
Mikel Laboa plaza
Honako plaza 2010 urtean izan zen inauguratua, eta maiatzean Juan Jose Arangurenek eginiko ´Ikimilikiliklik´ eskultura gehitu zitzaion guneari. Mikel Laboa Euskal Herriarentzat artista nabarmena izateaz gain, Usurbildarrak ziren Jose Anton eta Jexux Artze txalapartari anaien laguntasunak arrazoitzen zuen ere Usubilgo herrian bere homenean plaza bat izateak.
Mikel Laboa Mantzizidor (Donostia, Gipuzkoa, 1934ko ekainaren 15a – Donostia, 2008ko abenduaren 1a) euskal abeslaria eta musikagilea izan zen. Hainbat adituren ustez XX. mendeko euskal abeslari esperimentatzaile, ezagun eta eraginkorrenetarikoa izan da, bere oihartzuna gure mugetatik kanpora ere zabaldu zuena.
Hiru zutabek osatzen dute Mikel Laboaren kantagintza: kantu tradizionalen berreskuratzeak, poeta garaikideen hitzen musikatzeak eta lekeitioak deituriko kantuen esperimentazioak. Osagai horiekin, Laboa euskal musikagintzaren erreferentzia handienetakoa izan da 1960ko hamarkadatik hona: Ez Dok Amairu taldearen sortzaileetakoa eta euskal kantagintzaren berritzaile nagusietakoa izan da, eta euskal herritarren artean errespetu eta miresmen itzela du haren lanak.