Artiga de Lin eta Es Uelhs deth Joeu urjauzia

Val d'Aran ibarrean aurkitu daiteken ingurune natural ederrenetakoa da Artiga de Lin. Udan oso bisitatua, jende ugari hartzen du, baina aukerak ere asko dira.
Gausac edo Es Bórdes herrietatik joan daiteke bertara. Parkina dago, derrigorrezkoa udan, Mair de Diu ermita baina metro gutxi lehenago. Informazio puntua ere badago bertan, ibilbideen mapak dituzte. Garraio zerbitzua dago Mair de Diu ermitatik abiatu eta bi puntutara eramaten duena: Uelhs deth Joeu urjauzira edo Artiga de Lin aterpetxera. Nahi bezala konbinatu daiteke garraioa.

Hemendik bertatik abiatuko gara oinez, Joeu errekaren eskuin aldetik Uelhs deth Joeu urjauzi aldera. Zuhaizti artean, pago eta haritz zaharrez lagunduta egingo dugu ondo markatuta dagoen bidea. Tarteka errepide ondora aterako gara.

Ia bi kilometroko bidea eginda iritsiko gara urjauzira. Emari handiko urjauzia da, ikusgarria. Bertatik, zubia pasata, igoera motz batekin, Artiga de Lin zabalunerako bidea hartuko dugu. Ingurune hau paregabea da, paisaje natural zoragarria. Behin tontorrak begi bistan ditugula, espektakulu ederra da. Malh dera Artiga, Tuc de Pómero eta Malh des Pois tontorra ditugu aurrez aurre. Gune honetatik abiatzen da, bestalde, Arandik Anetora doan bide bakarra (9 orduko ibilbidea).

Artiga de Lin aterpetxera doan bidea jarraituko dugu; errepidez goazela mahiak daude itzal batean. Errepidetik itzuliko gara Uelhs deth Joeu urjauziaren bidegurutzera. Puntu honetan, txutxu-trena hartu dugu guk berriro ere aparkalekura itzultzeko. Baina, urjauzi ondora joanda hartu daiteke joaneko bidea.