Gasteizko kontzejuak. Ekialdea 2

Gure ibilbidea Oreitian hasiko dugu. Herritik hegoaldera joko dugu, garai bateko Oreitiako tren geralekura, trenbidea gurutzatzeko. Santa Teresa baseliza eta kanposantua utziko ditugu eskuinera eta soro-bidetik aurrera joango gara Zeriorantz. Herria gainaldetik zeharkatu eta errepidez metro batzuk egin ondoren, ezkerrera egingo dugu soroa eta basoa zeharkatuz. Argandoñan gaude. Eliza erromaniko polita dago bertan, eta sarreran agertzen denez, margoak barruan. Itxita dago eta ezin ikusi pinturak.Hurrengo bi herriak elkarren ondoan daude, soro ertzeko mugarri zahar batek adierazten digu non bukatzen den bata eta non hasten den bestea. Villafranca eta Andollu dira herriok. Vasco-Navarro trenaren bide gorriarekin egingo dugu topo Andollutik Estibaliz aldera abiatzean. Zerio erreka gaineko zubia utziko dugu eskuinera, eta soro artetik gorantz goazela, zubiak zeharkatuko du aipatutako bidegorria. Estibalizen gaude. Ezker aldera, muinoaren bizkarrean, etxetxo mordoa. Tontorrean Estibalizeko eraikuntzak eta ospetsua den eliza erromanikoa.
Oreitiako itzulera basoa zeharkatzen duen bidetik egingo dugu. Hamar minutuan bertan gara.